~ Altnordische & Klassische Gedichte & Volkslieder ~
Et Siegfriedleed
Em Land der Niebelunge, wor Siegfried vill besunge,
doch vun dem janze Schwindel is nichts sicher un jewiß.
Ich will et üch ens sage, wie et sich zojedrage,
ich weß dat von'ner alen Frau, die woß dat janz jenau.
Siegfried wor jo vill ze fuhl zo liere,
jing vill lever en de Büsch pussiere.
Sät singem Vadde, dat mach ich nemie met,
hä nohm en vum Gymnasium und stooch en en de Schmied.
Do kunnt dat Bürschje plöcke, manch Isestück verjöcke,
'ne Amboss vun 3000 Pond, dä schloch hä en de Grond.
Do krech de Schmied dat zeddere, de Kerl wor em zowiddere,
"Ach, wör de Kerl zom Huus erus", un droht em met de Fuus.
Scheck en en de Bösch zum Holz kleenmaache,
dät sich heimlich en dat Füsje laache,
Siegfried nohm de Drache kurz un jot.
Hä drieht dem Bies de Hals erüm un bad en singem Blood.
Do hät dat flinke Bürschje am janzen Liev e Kürschje,
un denk, nu bis de fein erus un flitz ens schnell no Hus.
Packt zosamme singe janze Plunder
un bejibt sich ens Land der Burgunder
överlät die Sach sich janz jenau,
verliebte en Kriemhilde sich un nohm se dann zur Frau.
Brunhild wor eifersüchtig, dä Kerl wor ihr ze düchtig
un över diese fesche Kerl wurd se vür Neid janz jerl.
Se sproch zum jrimmgen Hagen, dä Kerl lit mir em Magen.
Ach, wör dä Kerl de Eck eröm, ne Jrosche jöv ich dröm.
Hagen sproch, dat säste keenem doofe.
Waat dat Bürschje wed ich mir ens koofe,
un als Siegfried drank am Wasserpott,
do schlooch hä me'm Zachabel drop, dä Siegfried wor kapott.
Volkslied
Bild: Arthur Rackham, 1910